Ýagşygeldi Kakaýew adyndaky Halkara nebit we gaz uniwersitetinde häzirki zaman nebitgaz pudagynyň talaplaryna, halkara tejribä, EDD strategiýalaryna we durnukly ösüş ýörelgelerine laýyklykda işlenip taýýarlanan 5.37.04.33 «Nebitgaz pudagynyň ykdysadyýeti we dolandyrylyşy» taýýarlyk ugry boýunça täze magistrlik maksatnamasynda okuw sapaklary başlandy.

     Täze magistrlik maksatnamasy uniwersitetiň Erasmus+ maksatnamasynyň halkara taslamalaryna gatnaşmagynyň möhüm netijeleriniň biridir. Maksatnamanyň çäklerinde mazmuny ESGCA we GDCAU halkara taslamalarynyň netijelerine we okuw-usuly çemeleşmelerine esaslanýan iki sany täze ýöriteleşme açyldy.

     Magistrantlaryň birinji topary 5.37.04.33-01 «Nebitgaz pudagynyň ykdysadyýeti we dolandyrylyşy (EDD strategiýalary)» ýöriteleşmesi boýunça bilim alýar. Bu ýöriteleşme Erasmus+ maksatnamasynyň ESGCA – “Bridging Environmental Concerns, Societal Needs and Good Governance in Central Asian Education and Employment Sectors” taslamasynyň çäklerinde işlenip taýýarlanyldy.

     Ýöriteleşme nebitgaz kärhanalarynyň işinde ekologik, durmuş we dolandyryş ugurlary boýunça häzirki zaman çemeleşmelerini ulanmagy, EDD strategiýalaryny taýýarlamagy, ekologik we durmuş töwekgelçiliklerini bahalandyrmagy, korporatiw dolandyryşy kämilleşdirmegi hem-de jogapkärçilikli dolandyryş ýörelgelerini ornaşdyrmagy başarýan hünärmenleri taýýarlamaga gönükdirilendir.

     Magistrantlaryň ikinji topary bolsa 5.37.04.33-02 «Nebitgaz pudagynyň ykdysadyýeti we dolandyrylyşy (Nebitgaz pudagynyň durnukly ösüşi)» ýöriteleşmesi boýunça bilim alýar. Bu ýöriteleşme Erasmus+ maksatnamasynyň GDCAU – “Green Deal for Central Asian Universities” taslamasynyň çäklerinde işlenip taýýarlanan çemeleşmeler we okuw netijeleri esasynda döredildi.

     Ýöriteleşme nebitgaz pudagynyň uzak möhletleýin durnukly ösüşi, tebigy serişdelerden netijeli peýdalanmak, daşky gurşawa düşýän täsiri azaltmak, energiýa netijeliligini ýokarlandyrmak hem-de «ýaşyl» ykdysadyýet ýörelgelerini pudagyň ösüşine ornaşdyrmak boýunça döwrebap bilimleri we başarnyklary bermäge gönükdirilendir.

     2026-njy ýylyň 1-nji sentýabrynda täze magistrlik ýöriteleşmeleri boýunça bilim alýan magistrantlar üçin ilkinji amaly sapaklar geçirildi. Ilkinji sapaklaryň geçirilmegi täze magistrlik maksatnamasynyň iş ýüzünde durmuşa geçirilmeginiň we uniwersitetiň halkara bilim hyzmatdaşlygynyň netijelerini okuw işine ornaşdyrmagyň möhüm tapgyry boldy.

     Amaly sapaklaryň dowamynda magistrantlar özleriniň degişli ýöriteleşmeleri boýunça okuw derslerini öwrenmäge başladylar, okuw işiniň guralyşy, amaly taýýarlygyň aýratynlyklary hem-de häzirki zaman nebitgaz pudagynyň ösüşiniň esasy ugurlary bilen tanyşdylar. Okuw işinde amaly ugurly taýýarlyga, seljeriş we ylmy-barlag başarnyklaryny ösdürmäge, şeýle hem EDD we durnukly ösüş boýunça häzirki zaman halkara çemeleşmelerini ulanmaklyga aýratyn ähmiýet berilýär.

     Belläp geçsek, 5.37.04.33 «Nebitgaz pudagynyň ykdysadyýeti we dolandyrylyşy» taýýarlyk ugry boýunça täze magistrlik maksatnamasy uniwersitetde 2026–2027-nji okuw ýylynda işe girizildi. Kabul ediş synaglarynyň netijesinde magistrlik maksatnamasyna 50 sany dalaşgär okuwa kabul edilip, olar iki sany täze açylan ýöriteleşme boýunça toparlara bölündi.

     Täze ýöriteleşmeler boýunça ilkinji sapaklaryň başlanmagy uniwersitetiň Erasmus+ taslamalaryna gatnaşmagynyň möhüm netijeleriniň biridir hem-de halkara hyzmatdaşlygyň netijeleriniň ýurdumyzyň ýokary bilim ulgamyna iş ýüzünde ornaşdyrylýandygyny görkezýär.

     Täze magistrlik maksatnamalary nebitgaz pudagynyň ykdysadyýeti we dolandyrylyşy boýunça düýpli bilimleri häzirki zaman EDD strategiýalary, durnukly ösüş we «ýaşyl» özgertme ugurlaryndaky başarnyklar bilen utgaşdyrýan ýokary hünärli magistrleri taýýarlamaga giň mümkinçilik döredýär. Bu bilim maksatnamalarynyň durmuşa geçirilmegi nebitgaz pudagynyň häzirki zaman ykdysady, dolandyryş, ekologik we durmuş meselelerini netijeli çözmäge ukyply täze nesil hünärmenleriň taýýarlanylmagyna ýardam berer.